Dieu, qui trine en un fus, triple es, et trois seras,
Et, comme tes Eleus nous eterniseras,
De ton divin Esprit enflamme mon courage
Pour descrire ton Homme, et louer ton ouvrage,
Ouvrage vrayement Chef d'[oe]uvre de ta main :
A ton image fait et divin, et humain.
Premier en son Rien clos se celoit en son Tout,
Commencement de soy sans principe, et sans bout,
Inconnu, fors a soy connoissant toute chose,
Comme toute de soy, par soy, en soy enclose :
Masse de Déïté en soymesme amassee,
Sans lieu, et sans espace en terme compassee,
Qui ailleurs ne se peut, qu'en son propre tenir
Sans aucun tems prescrit, passé, ou avenir,
Le present seulement continuant present
Son estre de jeunesse, et de vieillesse exent :
Essence pleine en soy d'infinité latente,
Qui seule en soy se plait, et seule se contente
Non agente, impassible, immuable, invisible
Dans son Eternité, comme incomprehensible,
Et qui de soy en soy estant sa jouïssance
Consistoit en Bonté, Sapience, et Puissance.
-----------------------------------------------------------
Geen opmerkingen:
Een reactie posten